ກອງປະຊຸມ ຄະນະກຳມະການແຫ່ງຊາດ ເພື່ອຄົນພິການ ປະກອບດ້ວຍ ກອງປະຊຸມສາມັນ ແລະ ກອງປະຊຸມວິສາມັນ.
ກອງປະຊຸມສາມັນຈັດຂຶ້ນ ປີລະ ໜຶ່ງຄັ້ງ ໂດຍການເປັນປະທານ ຂອງປະທານຄະນະກຳມະການ ເພື່ອຄົນພິການ ແຕ່ລະຂັ້ນ ເພື່ອພິຈາລະນາ ແລະ ຕົກລົງບັນຫາສຳຄັນຕ່າງໆ ກ່ຽວກັບການຊຸກຍູ້ ແລະ ສົ່ງເສີມ ວຽກງານຄົນພິການ ສຳລັບຄະນະກຳມະການ ເພື່ອຄົນພິການ ແຕ່ລະຂັ້ນ ແລະ ວຽກງານກອງທຶນຄົນພິການ ສຳລັບ ຄະນະກຳມະການ ເພື່ອຄົນພິການ ຂັ້ນສູນກາງ.
ກອງປະຊຸມວິສາມັນ ຈັດຂຶ້ນເມື່ອໃດກໍໄດ້ ເພື່ອພິຈາລະນາບັນຫາຈຳເປັນ, ສຳຄັນ ແລະ ຮີບດ່ວນ ຕາມການຮຽກໂຮມ ແລະ ເປັນປະທານ ຂອງປະທານຄະນະກຳມະການ ເພື່ອຄົນພິການ ແຕ່ລະຂັ້ນ ຫຼື ຕາມການສະເໜີຂອງຫົວໜ້າກອງເລຂາ.
ກອງປະຊຸມຄະນະກຳມະການ ເພື່ອຄົນພິການ ແຕ່ລະຂັ້ນ ຈະເປີດຂຶ້ນໄດ້ກໍຕໍ່ເມື່ອມີຄະນະກຳມະການເຂົ້າຮ່ວມຢ່າງໜ້ອຍ ສອງສ່ວນສາມ ຂອງຈຳນວນທັງໝົດ.
ມະຕິຂອງກອງປະຊຸມ ຈະມີຜົນສັກສິດ ກໍຕໍ່ເມື່ອໄດ້ຮັບຄະແນນສຽງຫຼາຍກວ່າ ເຄິ່ງໜຶ່ງ ຂອງຈໍານວນສະມາຊິກທີ່ເຂົ້າຮ່ວມ. ໃນກໍລະນີ ມີຄະແນນສຽງເທົ່າກັນນັ້ນ ຄະແນນສຽງຂອງປະທານ ເປັນສຽງຊີ້ຂາດ.